බඩදරු වීම

කාලයක් පෙම් බැඳා
පෝරු මස්තකාරූඪ වී
පැතුයෙමි වන්නට
පූර්ණැති පවුලක්

සති ගණන් මාස ගණන් කල් ගත වූයේ
ගත වැගුරූ දාඩිය නැත පළ දුන්නේ
සිත් තුළ යම් කිසි දුක ඇති වූයේ
දොස්තර ළඟ පෝළිමේ සිට ගන්නේ

ඔබලා හට නැත කිසි අඩු පාඩූ
ඇත බොහො කල් තවමත් තරුණයි ලූ
අරගනු මේ බෙහෙත් , තව උත්සහ කරනූ
තුන්දහසයි බිල කැෂියර්ට ගෙවනූ

කෙරුවෙමු ඒ සියලු දේ පේවී
නැති කිසි පළක් ඇත මුදල් දියවී
නෑයන් අසයි “නැත්දැයි තවමත්“ නියැවී
ඇත මාගේ බිරිඳ සැමගෙන් කොන් වී

ඇත වෙද මහතෙක් රජරට කඩ පනහේ
ඔබ වැනි අයට ඔහු යහපත වන්නේ
අද හෙට ගොස් ඔබ ඔහු හමු වන්නේ
ඔබ හට නිසැක දරුඵල හිමි වන්නේ

බොහෝ වෙර දරා අංකය ලැබ ගන්නේ
පූරුවෙ පිනකටද මන්දා වෙදැදුරු හමුවන්නේ
දෙමසක් බෙහෙත් බොන්නට මේ දරුවන්නේ
එන අවුරුද්දේ අැරැගෙනු එනු ඔබේ දරුවන්නේ

ඈ හට ඇතිය දැන් යම් යම් රුදා
ඔක්කාරය ඇති විය ගිය බදාදා
ඉහවහා ගොස් සතුට නැති විය හිස රුදා
වන්නේය ඔබ මවක් , ගතිමි මම ඇය බදා